المغرب الساعة 8 ..
النهار طويل ..
الجو حر جدا..
مش قادر أشتغل من غير ما أشرب قهوة الصبح..

كل دي حاجات عاملة حواجز بيننا وبين الصيام.. هي حاجات حقيقية لكن مش مستحيل إننا نصوم بسببها..

بكرة الجمعة هتبدأ أحب الأيام إلى الله، والأعمال الصالحة أجرها أعظم من أي وقت تاني..

تيجي نثبت لربنا إننا نقدر نصوم ونتعب عشانه سبحانه وتعالى مهما كانت الظروف؟ أنا مستعد أتعب عشان أنت ترضى عني يا رب!
في ناس هتكون الأيام الجاية في الحج وهم في مشقة أكبر بكتير من أي حد تاني، بذلوا من وقتهم ومجهودهم وفلوسهم وتركوا بلادهم وجايين بس عشان حبهم لربنا فوق أي حاجة.. وبيقولوا لربنا لبيك اللهم لبيك..
لو أنت مش من الحجاج السنة دي، فعلى الأقل اجتهد واثبت لربنا إنه أكبر حاجة في قلبك وإنك مستعد تضحي وتجاهد وتبذل عشانه..لعله يرى منك الصدق فيكتبك من حجاج بيته السنة الجاية إن شاء الله..

يعني الناس في الحج بتصبر على كل المشقة دي واحنا مش هنقدر نصبر على كام ساعة صيام عشان ربنا سبحانه وتعالى؟

نحاول بقى نصوم الأيام الجاية على قد ما نقدر ونفكر كل الناس اللي حوالينا ونشجعهم..
الصيام ثقيل على النفس في الأيام دي ، لكن بإذن الله هيكون ثقيل كمان في ميزانك يوم القيامة..والله يضاعف لمن يشاء.